حدودِ اربعہ
سمنان ؛تہران اور وامغان کے درمیان کوہ البرز کے جنوب میں واقع ہے، شہر کے جنوب میں چھوٹی چھوٹی پہاڑیوں کا سلسلہ ہے جو پورے شہر کا احاطہ کیے ہوئے ہے، شمال مغرب میں کوہ نیزوا ہے، جس کی بلندی چار ہزار میٹر ہے، اور یہ سمنان کا سب سے اونچا پہاڑ ہے، شمال مشرق میں کوہ ”ابدال پیغمبران“ اور ”زرّیں کوہ“ ہے۔
خاندان نور بخشیہ نے تقریباً چار سو سال سمنان پر حکومت کی ، ان حکمرانوں کو سلطان کہا جاتا تھا، اور بعد میں تیمور کے غلبہ کے بعد اس حکومت کا خاتمہ ہوگیا، سلطان سید ابراہیم اسی خاندان کے پانچوے سلطان ہوئے۔
بشارتِ ولادت
سلطان ابراہیم کو جب تخت وتاج ملا تو ان کی عمر صرف بارہ سال کی تھی، پچیس سال کی عمر میں خدیجہ بیگم سے سلطان کا عقد نکاح ہوا، اور ان سے دو تین لڑکیاں پیدا ہوئیں، جب ایک عرصہ تک کوئی اولادِ نرینہ نہیں ہوئی تو آپ بہت متفکر رہنے لگے، ایک دن سلطان اپنی اہلیہ کے ساتھ نماز فجر کے بعد محل میں بیٹھے ہوئے تھے کہ اچانک محل میں ابراہیم مجذوب داخل ہوئے ، بی بی خدیجہ اور سلطان ابراہیم دونوں حضرت کو محل کے اندر دیکھ کر حیران رہ گئے، سلطان عقیدت کی بنیاد پر استقبال کے لیے کھڑے ہوگئے، اور بکمالِ ادب اپنی جگہ بٹھایا اور خود دست بستہ باادب کھڑے ہوگئے، مجذوب کہنے لگے تمہیں بیٹے کی خواہش ہے؟ سلطان بہت خوش ہوئے اور کہا کہ جو عنایت ہو تو مہربانی ہوگی، مجذوب نے کہا میں تمہیں عجوبۂ روزگار دوں گا، لیکن اس کی قیمت بہت زیادہ ہے، سلطان نے عرض کیا جو حکم ہو، فرمایا: ہزار شاہی اشرفیاں چاہیے، سلطان نے فوراً اشرفیاں منگائیں اور آپ کی نظر کیں،وہ خوش خوش اٹھے اور کہا کہ اے سلطان! تم نے ابراہیم سے بازی کی، اور سودا بہت سستا لیا ، وہ رخصت ہونے لگے تو بادشاہ چند قدم ان کے ہمراہ چلے، مجذوب نے مڑ کر دیکھا اور کہا اب کیا چاہیے؟ ایک بیٹا لے چکے، اچھا ایک اور سہی، اور یہ کہہ کر چلے گئے، چند دنوں بعد محل میں خوشی کے آثار نمودار ہوئے۔
اس کے علاوہ ایک روایت اور بھی ہے کہ سلطان ابراہیم ایک دن محل میں سورہے تھے، خواب میں حضور سیّد عالم ﷺ کے زیارت سے فیضیاب ہوئے، حضور نے ارشاد فرمایا کہ اے ابراہیم! خدا تجھ کو دو فرزند عطا کرےگا، ایک نام اشرف اور دوسرے کا نام اعرف رکھنا، اعرف بڑا عارف کامل ہوگا ، اور اس کے علم وفضل سے ایک جہاں مستفید ہوگا۔
پیدائش
آپ تقریباً ٧٠٩ اور ٧١٢ ہجری کے درمیان پیدا ہوئے، جس دن آپ کی ولادت ہوئی ابراہیم مجذوب یکایک دوبارہ تشریف لائے اور فرمایا کہ اس لڑکے کی بہت اچھی تربیت کرنا یہ ایک امانت ہے جو پروردگارِ عالم نے تمہارے سپرد کی ہے۔
بچپن اور پرورش
سلطان نے حضورﷺ کے فرمان کے مطابق مولود مسعود کانام اشرف رکھا، چونکہ آپ بڑی آرزؤں ،تمناؤں اور بشارتوں کے بعد پیدا ہوئے تھے، اس لیے بڑی ناز نعم سے پرورش بھی ہوئی، حضرت سید اشرف کی خداد ادذہانت اورذکاوت بچپن ہی سے ظاہر ہونے لگی۔
For Contact Us
Go to Contact Page
or
Mail:contact@makhdoomashraf.com
Cal:+91-9415721972